2018 წლის ანგარიში

დიმიტრი ცინცაძის სახელობის ფონდი - ჟურნალისტები ბავშვების გადასარჩენად, მეექვსე წელია თქვენი თანადგომით ლეიკემიითა და სიმსივნით დაავადებული ბავშვების გადასარჩენად იბრძვის. ჩვენ ერთად, ამ დროის განმავლობაში, 308 ბავშვს დავეხმარეთ,

ვიბრძოლეთ, მაგრამ მაინც დავკარგეთ ბევრი სიცოცხლე, ნათელი მათ ანგელოზ სულებს, მათი ხსოვნისთვის გავაგრძელებთ ბრძოლას სხვათა სიცოცხლისათვის. 
2018 წელი ფონდისთვის ფინანსური კრიზისის წელი გამოდგა, სამწუხაროდ, უარის თქმა მოგვიხდა არაერთ განცხადებაზე თანხების არქონის გამო, 2018 წლის განმავლობაში დახარჯული თანხის 80% ბენეფიციართა და მათი მშობლებისათვის ბილეთების შეძენაზე დაიხარჯა, 12% მედიკამენტებზე და დარჩენილი თანხა კვლევებსა და მკურნალობაზე.   ფონდის სახსრებიდან 2018 წელს სულ 243 597 ლარი გაიცა.

მადლობა თითოეულ თქვენგანს ყოველი შემოწირული ლარისთვის, მადლობა ჩვენი შვილობილების, მათი ოჯახების, ფონდის წევრების სახელით. ეს 6 წელი ჩვენ არ გავჩერდით და ვაგრძელებთ სიცოცხლისთვის ბრძოლას თქვენი მხარდაჭერის იმედით, რადგან მათი ბედი თქვენს ხელთაა, ჯანდაცვის, მუნიციპალიტეტების, სხვადასხვა ფონდების მნიშვნელოვანი მხარდაჭერის მიუხედავად, არის დიდი ნაწილი ხარჯებისა, რომელთა მოძიებაც ოჯახებს უკიდურესად უჭირთ, სწორედ ამ ტიპის ხარჯებს ანაზღაურებს დიმიტრი ცინცაძის სახელობის ფონდი. ჩვენ ვიძენთ მედიკამენტებს უცხოეთიდან, ვაფინანსებთ მგზავრობას და სასტუმროს, რეაბილიტაციისა და კვლევების, ხშირად არასრულად დაფინანსებული მკურნალობის ხარჯებსაც.

 გმადლობთ თანადგომისთვის, გმადლობთ ნდობისთვის, ჩვენ ერთად კიდევ არაერთ სიცოცხლეს გადავარჩენთ! დონაციისთვის ჩვენს ვებგვერდზე  მოძებნე დონაციის ღილაკი, პლასტიკური ბარათის საშუალებით შეასრულე ოპერაცია, დაეხმარე თუნდაც 1 ლარით სიმსივნითა და ლეიკემიით დაავადებულ პატარებს.